माणदेश एक्सप्रेस न्यूज : आटपाडी / प्रतिनिधी : आटपाडी नगरपंचायतीच्या सार्वत्रिक निवडणुकीत प्रभाग क्रमांक ४ मधून शिवसेनेचे उमेदवार धनाजी कानाप्पा चव्हाण यांनी निर्णायक विजय मिळवला आहे. दि. २ डिसेंबर रोजी पार पडलेल्या मतदानाची मतमोजणी आज (दि. २१) तहसील कार्यालयात पार पडली. निकाल जाहीर होताच शिवसेना कार्यकर्ते व समर्थकांमध्ये आनंदाचे वातावरण पाहायला मिळाले.
या प्रभागात चौरंगी लढत रंगली होती. शिवसेनेचे धनाजी कानाप्पा चव्हाण यांनी ३५५ मते मिळवत आघाडी घेतली. त्यांच्यापाठोपाठ राष्ट्रवादी काँग्रेसचे प्रवीण सुखदेव जाधव यांना २८१ मते मिळाली. भाजपचे जयवंत रामू माने यांना ७२ मते, तर तीर्थक्षेत्र विकास आघाडीचे अरुण तानाजी चव्हाण यांना ४८ मते मिळाली. NOTA ला ३ मते पडली.
निकाल जाहीर होताच धनाजी कानाप्पा चव्हाण यांच्या समर्थकांनी गुलाल उधळून, फटाके फोडून आनंद साजरा केला. अनेकांनी विजयी उमेदवाराचे अभिनंदन करत पुढील कार्यकाळासाठी शुभेच्छा दिल्या.
विजयानंतर बोलताना धनाजी चव्हाण यांनी मतदारांचे आभार मानत, प्रभागातील मूलभूत सुविधा, रस्ते, पाणीपुरवठा, स्वच्छता व नागरी विकासाच्या कामांना प्राधान्य देण्याचे आश्वासन दिले. हा विजय जनतेच्या विश्वासाचा असल्याचे त्यांनी नमूद केले.
