आटपाडी नगरपंचायत निवडणुकीत प्रभाग क्र. १ मधून स्वाती सुभाष सातारकर यांचा विजय

माणदेश एक्सप्रेस न्युज : आटपाडी / प्रतिनिधी : आटपाडी नगरपंचायतीसाठी दिनांक ०२ डिसेंबर रोजी झालेल्या सार्वत्रिक निवडणुकीच्या मतदानाची मतमोजणी आज (दि. २१) आटपाडी तहसीलदार कार्यालय येथे पार पडली. या मतमोजणीत प्रभाग क्रमांक १ मधून शिवसेनेच्या उमेदवार स्वाती सुभाष सातारकर यांनी विजय मिळवला आहे. त्यांच्या विजयानंतर समर्थकांमध्ये उत्साहाचे वातावरण निर्माण झाले होते.

प्रभाग क्रमांक १ साठी यावेळी तिरंगी लढत रंगली होती. शिवसेनेतर्फे स्वाती सुभाष सातारकर, भाजपकडून नम्रता दत्तात्रय माळी, तर तीर्थक्षेत्र विकास आघाडीकडून अनिता तुकाराम माळी यांनी निवडणूक रिंगणात उडी घेतली होती. मतमोजणीदरम्यान प्रत्येक फेरीत चुरशीची लढत पाहायला मिळाली. मात्र अंतिम फेरीत स्वाती सातारकर यांनी आघाडी घेत विजय निश्चित केला.

या निवडणुकीत शिवसेनेच्या उमेदवार स्वाती सातारकर यांना ४४९ अशी सर्वाधिक मते मिळाली. भाजपच्या नम्रता दत्तात्रय माळी यांना २७५ मतदान झाले त्या दुसऱ्या क्रमांकावर राहिल्या, तर तीर्थक्षेत्र विकास आघाडीच्या अनिता तुकाराम माळी यांना ८४ इतके मतदान झाले. तसेच NOTA ला २ मतदारांनी पसंती दिली.

विजयानंतर स्वाती सातारकर यांनी मतदारांचे आभार मानत, प्रभागाच्या सर्वांगीण विकासासाठी प्रामाणिकपणे काम करण्याचा संकल्प व्यक्त केला. मूलभूत सुविधा, स्वच्छता, पाणीपुरवठा, रस्ते व नागरिकांच्या दैनंदिन प्रश्नांना प्राधान्य देणार असल्याचे त्यांनी सांगितले.

(टीप : यामध्ये पोस्टल मतदान मोजणे बाकी आहे)