आटपाडी नगरपंचायत निवडणूक २०२५ : प्रभाग क्र. ९ मधून शिवसेनेच्या अनुजा चव्हाण यांचा विजय
माणदेश एक्सप्रेस न्यूज : आटपाडी / प्रतिनिधी : आटपाडी नगरपंचायत सार्वत्रिक निवडणूक २०२५ अंतर्गत प्रभाग क्रमांक ९ मधून शिवसेनेच्या उमेदवार अनुजा दत्तात्रय चव्हाण यांनी निर्णायक विजय मिळवत आपले वर्चस्व सिद्ध केले आहे. आज (दि. २१) तहसील कार्यालय, आटपाडी येथे पार पडलेल्या मतमोजणीत अनुजा चव्हाण यांनी ४६० मते मिळवून प्रतिस्पर्ध्यांवर स्पष्ट आघाडी घेतली.
या प्रभागात यंदा अत्यंत चुरशीची तिरंगी लढत पाहायला मिळाली. तीर्थक्षेत्र विकास आघाडीच्या रुपाली शैलेश ऐवळे यांना ४०२ मते मिळाली, तर भाजपच्या रेखा आनंदराव ऐवळे यांनी २०० मते मिळवली. याशिवाय NOTA ला ७ मते मिळाली. मतदान आणि मतमोजणीची प्रक्रिया शांततेत पार पडली.
प्रभाग क्रमांक ९ मध्ये निवडणुकीपूर्व काळात पाणीपुरवठा, रस्त्यांची दुरवस्था, स्वच्छता, तसेच नागरी सुविधा हे प्रमुख मुद्दे चर्चेत होते. या पार्श्वभूमीवर मतदारांनी बदलाच्या अपेक्षेने मतदान केल्याचे चित्र निकालातून स्पष्ट झाले आहे. अनुजा चव्हाण यांच्या विजयामागे स्थानिक नागरिकांशी थेट संवाद, घराघरात जाऊन केलेला प्रचार आणि महिलांचा मिळालेला पाठिंबा महत्त्वाचा ठरल्याचे राजकीय जाणकारांचे मत आहे.
विजयानंतर शिवसेना कार्यकर्त्यांमध्ये जल्लोषाचे वातावरण पाहायला मिळाले. फटाके फोडून, गुलाल उधळून कार्यकर्त्यांनी आनंद व्यक्त केला. यावेळी अनुजा चव्हाण यांनी सर्व मतदारांचे आभार मानत, “प्रभागातील सर्वसामान्य नागरिकांच्या विश्वासाला तडा जाऊ देणार नाही. मूलभूत सुविधा, स्वच्छता, पाणीपुरवठा आणि महिलांसाठी विशेष उपक्रम राबवण्यासाठी प्राधान्याने काम करेन,” असा विश्वास व्यक्त केला.
